Nga Gjilani, përmes postës, recenzenti dhe krijuesi Ragip Ramaj ka pranuar librin më të ri të poetit të mirënjohur për fëmijë e të rinj, Avdush Canaj, me titull “Rritesh për një puthje”.
Ai e ka vlerësuar Canajn si një nga poetët më të mirë të letërsisë shqipe.
“Faleminderit, miku im Avdush! Ndihem i nderuar që isha njëri prej dy recensentëve të librit (së bashku me studiuesin e letërsisë, Xhahid Bushatin)”, shkruan Ramaj.
Në recensionin e tij, ai thekson:
“Libri ‘Rritesh për një puthje’ është një libër për fëmijë e të rinj, që mund të lexohet edhe si poemë e gjatë me 72 kapituj apo si roman në vargje, me temën bosht, plagën shekullore të kurbetit. Fantazia e pasur dhe e thellë e poetit, e ndërthurur me gjuhën e pasur dhe figuracionin e gjetur, e bëjnë këtë libër një vepër të denjë, që e vendos Avdush Canajn mes poetëve më të mirë të letërsisë shqipe bashkëkohore. Ky libër nderon autorin, veprën e tij, lexuesin dhe mbi të gjitha letërsinë shqipe.”
Sipas Ramajt, si në librat e mëparshëm të Canajt, edhe në këtë vepër spikatin vlerat ideo-estetike, ku vargu i lirë dhe modern i autorit sjell poezi me gjuhë të zgjedhur artistike dhe mesazhe të fuqishme.
