Solidariteti vazhdon të jetë pjesë e pandashme e jetës në Komunën e Kamenicës. Një qytetar anonim nga fshati Topanicë ka bërë një gjest të rrallë duke dhuruar 250 kilogramë miell nga të korrurat e tij, për familjet që përballen me kushte të rënda jetese.
Mielli është dorëzuar në zyrat e Kryqit të Kuq, dega në Kamenicë, nga ku do të shpërndahet drejt atyre që kanë më shumë nevojë.
Sekretari i kësaj dege, Rexhep Morina, e ka cilësuar këtë akt si një dëshmi të fuqishme të humanizmit që jeton në mesin e komunitetit kamenicas.
“Ky veprim është shembull frymëzues për të gjithë ne. Bashkë jemi më të fortë dhe mund të sjellim ndryshim në jetën e atyre që kanë më pak fat”, u shpreh Morina.
Ndihma për familjet në nevojë nuk është ndalur me kaq. Në partneritet me KFOR-in Italian, njësinë Carabinieri MSU, është realizuar një shpërndarje ndihmash për një familje me sfida të mëdha në fshatin Koretin.
“Falë bashkëpunimit të ngushtë me KFOR-in Italian, kemi arritur të ofrojmë lehtësim dhe shpresë për një familje në vështirësi. Këto gjeste janë dëshmi e solidaritetit ndërinstitucional dhe e përkushtimit tonë për të qenë pranë qytetarëve”, shtoi Morina.
