Kampion i shumëfishtë, profesor dhe doktor i shkencave fizike
Elhami Shabani nga Gjilani është një nga figurat më të kompletuara të sportit kosovar: karateist i dalluar, kampion i shumëfishtë, profesor i edukatës fizike dhe doktor i shkencave fizike.
Historia e tij është dëshmi e qartë se përkushtimi, puna e palodhur dhe besimi në vetvete mund të tejkalojnë çdo vështirësi.
Fillimet në karate, trashëgimi familjare dhe disiplinë jetësore
Karatenë e ka nisur që në fëmijëri, nën udhëheqjen dhe ndikimin e drejtpërdrejtë të babait të tij, i cili ishte udhërrëfyesi i parë dhe mbështetësi kryesor në rrugëtimin sportiv. Që i vogël, Elhamiu ishte shumë energjik dhe aktiv, gjë që e shtyu drejt sportit dhe disiplinës së karatesë, me synimin për t’u forcuar fizikisht dhe mendërisht.
Karrierë e artë sportive me rekorde historike
Gjatë karrierës së tij sportive, Shabani ka arritur rezultate të jashtëzakonshme: 16 herë kampion i Kosovës, 12 herë kampion mbarëkombëtar, nënkampion ballkanik, medalje e bronztë në Kampionatin Evropian .
Ai mban një rekord historik: medalisti i parë evropian tek seniorët në historinë e qytetit të Gjilanit, nga të gjitha sportet dhe të gjithë sportistët.
Përveç këtyre, ai ka fituar qindra medalje të arta në gara vendore dhe ndërkombëtare.
Sporti si mënyrë jetese, jo vetëm garë
Këto suksese janë rezultat i punës së palodhur, disiplinës së vazhdueshme dhe përkushtimit afatgjatë ndaj karatesë, e cila për Elhami Shabanin nuk ka qenë vetëm sport, por një mënyrë jetese dhe filozofi personale.
Vështirësitë ekonomike dhe rruga drejt dijes
Duke qenë se familja kishte vetëm një burim të ardhurash, Elhamiu u detyrua që paralelisht me shkollën e mesme të mësonte edhe zanatin e elektricistit, për të siguruar mjete financiare për studime.
Me këmbëngulje dhe sakrificë, ai arriti të përfundojë studimet universitare, masterin dhe më pas edhe doktoraturën, pa u dorëzuar asnjëherë nga ëndrra e tij.
Trajnerë, i vetëm dhe stërvitje pa kushte
Në fëmijëri u stërvit fillimisht te trajneri Kadri Elezi, pastaj te Idriz Musliu, por pas mbylljes së klubit nga njëri trajner dhe migrimit të tjetrit, nga mosha 18-vjeçare u detyrua të vazhdojë stërvitjet i vetëm, duke qenë njëkohësisht garues dhe trajner i vetvetes.
“Ishte periudhë jashtëzakonisht e vështirë, por gjithmonë i thosha vetes se është kohë kalimtare dhe se do të vijnë ditë më të mira”, shprehet ai.
Sot: doktor shkence, profesor dhe trajner i Reprezentacionit
Sot, Elhami Shabani është: doktor i shkencave, mësimdhënës, trajner i Reprezentacionit, themelues i klubit “Karate Club Emperors”, përfitues i pensionit jetësor nga Ministria e Sportit, që nga mosha 35-vjeçare, për medaljen evropiane.
Ai thekson se pensioni nuk e ka ndalur të punojë e të kontribuojë edhe më tej në sport.
Kritikë brezave të rinj: “Kushtet janë më të mira, por përkushtimi më i vogël”
“Sot ka karateistë shumë të mirë, por secila gjeneratë është më përtace dhe më pak e përkushtuar për punë”, thotë Shabani.
Ai kujton se në kohën e tij mungonin kushtet elementare:
“Nuk kishim sallë, nuk kishim para për palestër, vraponim në borë, shi e dimër. Sot kushtet janë shumë më të mira dhe cilësia e trajnerëve është rritur ndjeshëm.”
Familje kampionësh
Përveç Elhamiut, edhe dy vëllezërit e tij më të vegjël, Benjamini dhe Shpresimi, merren me karate dhe janë kampionë të shumëfishtë të Kosovës, medalistë ballkanikë dhe mesdhetarë.
Benjamini ka arritur edhe: Vendin e tretë në Evropë U-21, titullin kampion i Kupës së Botës U-21
Klubi “Emperors”, cilësi para numrit
Aktualisht Elhami Shabani drejton klubin e tij Karate Club Emperors, ku thekson se nuk synon numër të madh garuesish, por përgatitje cilësore dhe rezultate konkrete.
“Preferoj pak sportistë, por të përgatitur mirë dhe me suksese reale”, përfundon ai.
Shënim:
Ky tekst nuk mund të kopjohet as të tjetërsohet.
Mund të shpërndahet vetëm si link.
Falemnderit për respektimin e etikës së gazetarisë!
Botuesi dhe redaktori:
/F.S./
