Tre kartonë të kuq në tri ndeshje radhazi janë kthyer në një makth të vërtetë për kampionin në fuqi, Dritën e Gjilanit. Dy prej tyre erdhën në ndeshjet evropiane, ndërsa i treti sot në Ferizaj, duke ngritur shqetësime serioze për disiplinën e skuadrës.
I pari që e la skuadrën me një lojtar më pak ishte Liridon Balaj, në ndeshjen kthyese ndaj Copenhagen-it në Prishtinë, pas një ndërhyrjeje krejtësisht të panevojshme në një pozitë jo të rrezikshme.
Më pas, në sfidën e rëndësishme kundër gjigantit rumun FCSB, ishte kapiteni Rron Broja që u ndëshkua me të kuq, duke e vështirësuar edhe më shumë situatën e gjilanasve në arenën ndërkombëtare.
Dhe, në nisjen e edicionit të ri të Albi Mall Superligës, Drita u përball sërish me të njëjtin fat: Mbrojtësi Raddy Ovouka mori karton të kuq, duke e lënë skuadrën në disavantazh numerik në Ferizaj.
Këto raste, të cilat në dukje janë pasojë e pakujdesisë dhe mungesës së kontrollit të emocioneve, duhet patjetër të analizohen nga stafi teknik. Pa ndërhyrje serioze dhe masa disiplinore, ky trend mund të kushtojë shtrenjtë në vazhdim të sezonit.
