Reshjet e borës në fillim të tetorit, një fenomen i pazakontë për Kosovën, kanë sjellë ndikime të dyfishta në sektorin bujqësor.
Sipas Institutit Hidrometeorologjik të Kosovës, bora e hershme ka ndikuar negativisht në pemëtari dhe perimkulturë.
Shumë pemë frutore, si mollët, dardhat dhe kumbullat, ende nuk janë vjelur plotësisht, duke shkaktuar thyerje të degëve dhe dëmtime në fruta.
Po ashtu, temperaturat e ulëta dhe bora e lagësht rrisin rrezikun e sëmundjeve fungale. Humbje priten edhe në kulturat e hapura të perimeve të vonshme, si domatet, specat dhe kungujt.
Megjithatë, ky fenomen ka sjellë edhe disa efekte pozitive. Bora ka rritur lagështinë e tokës dhe ka përmirësuar strukturimin e saj, duke krijuar kushte më të favorshme për mbjelljen e grurit dimëror dhe kulturave të tjera si elbi, thekra dhe tritikali.
Kjo gjithashtu zvogëlon nevojën për ujitje suplementare në fazën e hershme të zhvillimit të bimës.
Ekspertët theksojnë se reshje të tilla të hershme duhet të shihen si sinjal i ndryshimeve klimatike dhe nevojës për përshtatje të praktikave bujqësore ndaj kushteve gjithnjë e më të paqëndrueshme atmosferike.
