Qendra Kryesore e Mjekësisë Familjare “Dr. Nagip Rexhepi” në Gjilan, nesër do të organizojë përmbylljen e aktiviteteve vetëdijesuese në kuadër të muajit “Rozë”, muajit të ndërgjegjësimit për kancerin e gjirit.
Aktiviteti do të zhvillohet me Marshin Sensibilizues, ku ftohen të gjithë qytetarët e Komunës së Gjilanit, si dhe punëtorët e institucioneve të ndryshme, që t’i bashkohen kësaj nisme humanitare.
Marshi do të mbahet të enjten, më 30 tetor 2025, nga ora 12:00.
Nisja do të bëhet nga QKMF-ja dhe do të vazhdohet deri në qendër të qytetit, për të përfunduar në Shtëpinë e Rinisë, ku do të mbahet edhe një panel diskutimi mbi kancerin e gjirit.
Organizatorët theksojnë rëndësinë e diagnostikimit të hershëm si hap jetik në parandalimin dhe trajtimin e suksesshëm të kësaj sëmundjeje.
“Diagnostifikimi i hershëm shpëton jetë! Kanceri i gjirit mund të prekë këdo.”
Kjo ngjarje është bërë e ditur nga faqja zyrtare e QKMF-së “Dr. Nagip Rexhepi” në Gjilan.
