Një fotografi e realizuar me dron nga fotografi i njohur kosovar dhe ruajtësi i natyrës, Arian Mavriqi, ka vënë në pah gjendjen aktuale të liqenit të Përlepnicës, i cili pas reshjeve të fundit është mbushur pothuajse tërësisht me ujë.
Sipas vlerësimeve dhe kujtesës kolektive, rrallëherë mbahet mend që ky liqen, i cili përbën një nga burimet kryesore të furnizimit me ujë të pijshëm për qytetin e Gjilanit, të ketë pasur një nivel kaq të lartë të ujit.
Pamjet nga ajri dëshmojnë qartë përmirësimin e ndjeshëm të gjendjes së rezervave të ujit në këtë zonë.
Pa dyshim, kjo paraqet një lajm të mirë, sidomos në një periudhë kur vitet e fundit janë karakterizuar nga mungesë e reshjeve të borës dhe rritje e dukshme e dendësisë së popullsisë në qytet, çka ka shtuar nevojat për ujë.
Mbushja e liqenit ofron siguri më të madhe për furnizimin me ujë dhe shpresë për stabilitet të rezervave ujore në muajt në vijim.
