Universiteti “Kadri Zeka” në Gjilan ka shënuar një tjetër sukses në arenën ndërkombëtare të arsimit, duke fituar pesë projekte të reja në kuadër të programit të Bashkimit Evropian Erasmus+ CBHE (Capacity Building in Higher Education). Në njërin nga projektet, UKZ do të ketë edhe rolin e koordinatorit, që është një arritje e rrallë për universitetet në vend.
Lajmin e ka bërë të ditur Prorektori për Bashkëpunim Ndërkombëtar, Prof. Dr. Dukagjin Leka, i cili ka vlerësuar përkushtimin dhe punën ekipore të stafit akademik e administrativ të universitetit. Ai ka falënderuar veçanërisht Rektorin Prof. Asoc. Dr. Artan Dërmaku për mbështetjen e vazhdueshme drejt ndërkombëtarizimit të institucionit.
Këto projekte do të përfshijnë bashkëpunime me universitete partnere nga Shqipëria, vendet e BE-së dhe Afrika, duke synuar përmirësimin e cilësisë në arsimin e lartë, modernizimin e kurrikulave, avancimin e metodave të mësimdhënies dhe integrimin e teknologjisë në proceset akademike.
“Kjo është një arritje e madhe për universitetin tonë, që forcon pozitën e UKZ-së si institucion serioz dhe aktiv në projekte ndërkombëtare”, është shprehur Prof. Leka.
