Në prag të Ramazanit shpërndahen 60 pako ushqimore për familjet në nevojë në Gjilan
Në prag të muajit të shenjtë të Ramazanit, Shoqata Bereqeti – Dega në Gjilan, në bashkëpunim me Fondacionin Bereka Charity, ka realizuar shpërndarjen e 60 pakove ushqimore për 60 familje në nevojë.
Ky aktivitet humanitar është zhvilluar me qëllim të lehtësimit të gjendjes sociale të familjeve përfituese, duke përcjellë mesazhin e solidaritetit, bamirësisë dhe kujdesit për më të rrezikuarit, vlera këto që janë thelbësore në muajin e shenjtë të Ramazanit.
Nga Shoqata Bereqeti është shprehur falënderim i veçantë për Fondacionin Bereka Charity, si dhe për të gjithë kontribuuesit dhe donatorët, të cilët bënë të mundur realizimin e këtij aksioni humanitar.
Këshilli i Bashkësisë Islame – Gjilan dhe Shoqata Bereqeti – Dega Gjilan kanë theksuar se aksione të tilla do të vazhdojnë edhe në të ardhmen, në shërbim të familjeve në nevojë dhe forcimit të solidaritetit në komunitet.
