Rekordmani i njohur botëror dhe profesori i matematikës nga Vitia, Agim Agushi, ka arritur sot të shënojë edhe dy rekorde të reja në librin e rekordeve Guinness, gjatë një sfide spektakolare të zhvilluar në ndërtesën më të lartë në botë, Burj Khalifa në Dubai.
Agushi ka demonstruar një përqendrim dhe zotësi të jashtëzakonshme duke zhongluar me top në kokë gjatë ngjitjes dhe zbritjes së shkallëve të rrokaqiejve të famshëm.
Në pjesën e parë të sfidës, ai realizoi ecjen lart shkallëve duke përshkuar 2,160 shkallë me top në kokë, ndërsa po aq shkallë i përshkoi edhe gjatë zbritjes poshtë.
Në total, ai kaloi 4,320 shkallë brenda një kohe rekorde prej 1 ore e 12 minutash.
Pas përfundimit me sukses të kësaj arritjeje të madhe, Agushi shprehu falënderimet e tija të përzemërta për stafin e Burj Khalifa-s për mbështetjen logjistike, sponsorët që mundësuan realizimin e këtij projekti, si dhe ekipin e tij mbështetës, Dan Qarkaj, Milot Haziri dhe Leutrim Agushi, të cilët dhanë një kontribut të çmuar në realizimin e këtij suksesi historik./dita24h/
