Drejtoria Rajonale e Policisë në Prizren ka njoftuar për një rast të shembullt të ndershmërisë qytetare që ka ndodhur sot në këtë qytet.
Më datë 21 shtator 2026, një qytetar ka gjetur në rrugë një kuletë me dokumente personale, 505 euro si dhe disa lei rumunë para të gatshme. pa hezituar, ai i është drejtuar menjëherë Stacionit Policor në Prizren për të raportuar rastin dhe për të dorëzuar sendet e gjetura.
Falë verifikimit të shpejtë të dokumentacionit nga ana e zyrtarëve policorë, është bërë i mundur identifikimi i pronarit – po ashtu një qytetar nga Prizreni – të cilit i janë kthyer kuleta, dokumentet dhe të gjitha paratë e gatshme.
Policia e Kosovës ka shprehur falënderime të përzemërta për veprimin e ndershëm të qytetarit, duke e cilësuar atë si një model shembullor të bashkëpunimit me institucionet.
Përmes këtij njoftimi, policia po ashtu i rikujton qytetarët se përvetësimi apo “marrja e sendit të huaj”, qoftë edhe i gjetur në rrugë, përbën vepër penale dhe është i dënueshëm sipas Kodit Penal të Republikës së Kosovës.
