Kuvendi i Komunës së Gjilanit, në një seancë solemne të udhëhequr nga kryesuesja Krenare Latifi-Kqiku, ka nderuar sot veprimtarin e çështjes kombëtare Muharrem Aliu me titullin “Qytetar Nderi” (Post Mortem).
Nderimi u bë me iniciativë të kryetarit Alban Hyseni, me rekomandim të Komisionit për dhënien e titujve të nderit dhe me mbështetjen e plotë të subjekteve politike në Kuvend.
Titulli iu nda me motivacionin:
“Për kontributin e jashtëzakonshëm në çështjen kombëtare, qëndresën e palëkundur patriotike dhe sakrificën për lirinë e shqiptarëve, si dhe për angazhimin e tij në zhvillimin e Pogragjës dhe të trevës së Gjilanit.”
Kryesuesja e Kuvendit, Krenare Latifi-Kqiku, e vlerësoi Muharrem Aliun si një atdhetar që e vuri çështjen kombëtare mbi interesin personal në periudhat më të vështira për popullin shqiptar. Ajo nëvizoi guximin dhe sakrificën e tij, si dhe angazhimin në luftërat e udhëhequra nga Mulla Idriz Gjilani e më vonë në veprimtarinë nacional-demokrate shqiptare.
Në emër të kryetarit Hyseni, nënkryetari Arianit Sadiku e cilësoi atë si një kolos të historisë:
“Kur flasim për Muharrem Aliun, flasim për një epokë të tërë të historisë sonë. Ai ishte njeriu i cili tërë jetën ia kushtoi idealit për liri dhe bashkimit kombëtar,” tha Sadiku, duke rikujtuar rreshtimin e tij krah Mulla Idriz Gjilanit në frontin e Bujanocit dhe Preshevës.
Gjithashtu, në emër të Grupit të Këshilltarëve të LDK-së, asambleisti Fitim Guda lartësoi figurën dhe kontributin e veprimtarit.
Në emër të familjes Aliu, Agron Aliu shprehu falënderimet e thella për këtë nderim, duke theksuar se ky titull përben një përgjegjësi të madhe morale për familjen dhe për brezat që vijnë.
Seanca solemne mblodhi personalitete të shumta, mes të cilëve deputetja Arijeta Rexhepi, përfaqësues të Policisë së Kosovës dhe FSK-së, kryetari i KBI-së në Gjilan Naim Aliu, ish-kryetari i Gjilanit Lutfi Haziri, ish-komandanti i Zonës Operative të Karadakut Ahmet Isufi, si dhe familjarë të dëshmorëve e të veprimtarit Muharrem Aliu.
