Drita, përkundër një paraqitjeje mbresëlënëse dhe epërsisë së hershme prej 2:0, nuk arriti të sigurojë një rezultat pozitiv në ndeshjen e parë të raundit kualifikues të Europa League ndaj skuadrës rumune, FCSB.
Skuadra bardhekaltër e nisi fuqishëm ndeshjen, duke kaluar në epërsi që në minutën e 7-të, falë një goditjeje të saktë nga Vetoin Tusha. Në minutën e 50-të, ishte sulmuesi Arb Manaj që dyfishoi avantazhin me një finalizim të shkëlqyer, duke i dhënë shpresa të mëdha Dritës për një rezultat historik.
Mirëpo, gjithçka ndryshoi pas minutës së 60. FCSB ngushtoi rezultatin në minutën e 64-të përmes Darius Bîrligea, ndërsa tetë minuta më vonë, në minutën e 72-të, Dragos Graovac barazoi shifrat në 2:2.
Kur dukej se ndeshja do të përfundonte me këtë rezultat, në minutat shtesë gjyqtari akordoi një penallti për vendasit. Bîrligea ishte i saktë nga pika e bardhë, duke i dhënë fitoren 3:2 FCSB-së dhe duke i shkaktuar zhgënjim të thellë skuadrës së Dritës.
Ndeshja e kthimit luhet pas një jave dhe pritet të jetë vendimtare për fatin e kualifikimit.
