Fotografi nga Kamenica që dokumenton botën e egër ballkanike
Nga pasioni i fëmijërisë në dokumentarin e vetëm në Ballkan
Arian Mavriqi, fotograf dhe dokumentarist nga Kamenica, është një nga emrat më të njohur të fotografisë së natyrës në Kosovë e rajon.
Ai është rrëfyer për rrugëtimin e tij profesional, që nisi nga një pasion fëmijërie pranë lumit të Kamenicës, aty ku lindi dashuria për botën e shpendëve dhe kafshëve të egra.
“Që në fëmijëri më ka magjepsur jeta e shpendëve dhe ujorëve. Dëshira ime ishte t’i dokumentoja dhe t’ia shfaqja popullit tim pamjet e kafshëve të egra që nuk i kishin parë ndonjëherë,” rrëfen Arian Mavriqi, i cili sot është autor i dokumentarit të vetëm të këtij lloji në gjithë Ballkanin.
Nga Kamenica në Afrikë e deri te ëndrra për ariun e bardhë
Fotografinë e nisi të publikojë në vitin 2012, ndërsa nga 2015 filloi të eksplorojë jashtë Kosovës, në Shqipëri, Greqi, Rumani, Hungari, Maqedoninë e Veriut, Mal të Zi e Afrikë.
Fotot e tij nga Lugina e Karavastasë dhe Narta morën vëmendje të madhe, aq sa atij iu dha shtetësia shqiptare për kontributin në promovimin e faunës së egër.
Sot ai synon të udhëtojë në Skandinavi, ku dëshiron të realizojë një dokumentar për ariun e bardhë, një projekt i kushtueshëm por që mbetet ëndrra e tij më e madhe.
Një jetë mes fesë, familjes dhe pasionit për natyrën
Arian Mavriqi është njeri i besimit dhe i përkushtimit. Ai nuk e lë asnjë namaz pa e falur, qoftë në udhëtime apo në terrene të largëta.
“Për namaz nuk ka arsyetim. Edhe nëse jam në mal apo në pyll, kur vjen koha, i nënshtrohem Allahut me kënaqësi,” thotë ai.
Në rrugëtimin e tij e kanë mbështetur fort nëna dhe gruaja, të cilat kanë qenë pjesë e çdo etape të jetës dhe dokumentarëve të tij.
Nga gazetaria në dokumentarët për jetën e egër
Përveç fotografisë, Mavriqi ka punuar edhe në media.
Ka qenë drejtor në Radio Kamenica, më pas në Radio Premiera (2000–2005), ndërsa nga 2020 deri më 2022 ishte pjesë e RTK-së.
Aktualisht punon në KTV, ku vazhdon me dokumentarin e tij të njohur “Wildlife me Arian Mavriqin.”
Synimet e ardhshme: Libri “Wild Kosova” dhe dokumentari për jetën e egër
Arian Mavriqi është duke finalizuar librin e tij “Wild Kosova”, që pritet të botohet në fund të dhjetorit 2025, dhe paralelisht po punon në një dokumentar 50-minutash për jetën e egër në Kosovë.
“Kosova ka potencial të jashtëzakonshëm për fotografi të natyrës, por mungojnë kushtet për turistët, si vrojtoret, bujtinat dhe guidat profesionale. Megjithatë, unë besoj se kjo pasuri do të vlerësohet gjithnjë e më shumë”, përfundon ai.
Mbrojtësi i natyrës
Rruga e Arian Mavriqit tregon se edhe nga një qytet i vogël si Kamenica mund të lindin vepra të mëdha që frymëzojnë dhe japin dritë gjithë vendit. Dashuria për natyrën, besimi dhe puna e palodhur janë çelësi i suksesit të tij.
Përveç punës si fotograf dhe dokumentarist, Arian tregon edhe angazhim të madh për mbrojtjen e natyrës: shpesh mbledh mbeturina në terren, duke dhënë shembull se natyra duhet ruajtur e jo dëmtuar, një mesazh që frymëzon të gjithë qytetarët.
Shembull frymëzues i pasionit dhe përkushtimit
Në fund të këtij rrëfimi frymëzues, Arian Mavriqi mbetet një shembull i rrallë i përkushtimit dhe dashurisë për natyrën.
Rrugëtimi i tij drejt realizimit të dokumentarit për “Ariun e Bardhë” dhe botimit të librit “Wild Kosova” tregon se kur pasioni për natyrën bashkohet me punë të palodhur dhe vullnet të fortë, çdo ëndërr mund të bëhet realitet.
Shënim:
Ky tekst nuk mund të kopjohet as të tjetërsohet.
Mund të shpërndahet vetëm si link.
Falemnderit për respektimin e etikës së gazetarisë!
Botuesi dhe redaktori:
/F.S./
