Albin Kurti, kryeministri në detyrë i Qeverisë së Kosovës ka përshëndetur qytetarët pas zgjedhjeve të djeshme.
Ai ka shkruar:
“Mirëdita të dashur qytetarë, Në dhjetë ditë fushatë, dhjetëra mijëra duar të shtrënguara dhe mijëra dyer të hapura nga ju, në qindra takime e tubime anembanë vendit. Na pritët me ngrohtësi e besim dhe për këtë ju falënderoj përzemërsisht. Jeni shumë, madje aq shumë sa shumicës nuk ua njohim e nuk ua dimë emrin. U angazhuat pa kursim për fitoren e Lëvizjes VETËVENDOSJE! me partnerë, për fitoren tuaj.
Të dashur bashkatdhetarë që erdhët nga Evropa, Amerika dhe çdo cep i botës, ose që votuat me postë apo fizikisht në ambasadat dhe konsullatat tona, ju jemi mirënjohës përjetë për kontributin tuaj të pamatshëm për liri, shtet e komb, si dhe për përkrahjen vendimtare që e bëri këtë fitore aq madhështore sa historike.
Puna vazhdon, siguria dhe begatia do të shtohen.
Na priftë e mbara!”
