Sabri Ahmetaj, një figurë kyçe e arsimit shqiptar dhe pionier i mësimdhënies shkencore në gjuhën shqipe
Shkolla Fillore “Selami Hallaci” në Gjilan është një nga institucionet më të rëndësishme arsimore të qytetit, e cila u formua si përgjigje ndaj rritjes së vazhdueshme të popullsisë dhe nevojës për zgjerimin e rrjetit shkollor.
Ajo ishte shkolla e tretë fillore e themeluar në Gjilan dhe për vite me radhë u shndërrua në një model të organizimit dhe cilësisë arsimore në Kosovë.
Fillimet e shkollës dhe kushtet e para
Fillimisht, mësimi në këtë shkollë nisi në objektin e vjetër të gjimnazit të atëhershëm të Gjilanit.
Ky objekt më vonë u rrënua pasi u përfshi nga zjarri dhe u shkatërrua plotësisht.
Pavarësisht kushteve të vështira, procesi mësimor nuk u ndal dhe shkolla vazhdoi funksionimin falë përkushtimit të kuadrit arsimor.
Sabri Ahmetaj – drejtori i parë i institucionit
Drejtori i parë i Shkollës Fillore “Selami Hallaçi” ishte Sabri Ahmetaj, me origjinë nga Hogoshti i Komunës së Kamenicës, por që jetonte dhe vepronte në Gjilan.
Ai u emërua në krye të këtij institucioni në një periudhë të ndjeshme për arsimin shqip dhe dha një kontribut të jashtëzakonshëm në ndërtimin e themeleve të shkollës.
Një arsimtar me formim të lartë profesional
Prof. Sabri Ahmetaj lindi në vitin 1935 në Hogosht. Shkollën Normale e përfundoi në Prishtinë në vitin 1954, ndërsa Shkollën e Lartë Pedagogjike – Dega Biologji-Kimi, po ashtu në Prishtinë, në vitin 1960.
Misionin e mësuesisë e nisi që në vitin shkollor 1952/53, duke dhënë mësim në disa fshatra të Komunës së Kamenicës dhe më pas në Gjilan.
Drejtimi i shkollës dhe objekti i ri
Në vitin 1975, Shkolla Fillore “Selami Hallaçi” filloi punën në objektin e saj të ri, një ndërtesë moderne për kohën, e cila për shumë vite u konsiderua model në Kosovë për nga rendi shtëpiak, pastërtia, menaxhimi dhe cilësia e kuadrit arsimor.
Prof. Ahmetaj e drejtoi këtë shkollë deri në vitin 1981, kur u shpërngul përfundimisht në Prishtinë.
Pionier i arsimit shkencor në gjuhën shqipe
Një nga kontributet më të mëdha të Prof. Sabri Ahmetajt ishte fakti se ai ishte profesori i parë që ligjëroi lëndët Biologji dhe Kimi në gjuhën shqipe, duke zëvendësuar profesorët serbë që më parë i mbanin këto lëndë në gjuhën serbokroate edhe për nxënësit shqiptarë.
Ky hap shënoi një moment historik në institucionalizimin e arsimit shkencor në gjuhën shqipe në Kosovë.
Angazhime institucionale dhe sfida politike
Gjatë viteve 1968–1973, Prof. Ahmetaj shërbeu si këshilltar i mësimdhënies për Biologji dhe Kimi në Entin Pedagogjik të Gjilanit.
Më vonë, pas shpërnguljes në Prishtinë, u punësua në Ndërmarrjen e Tregtisë së Bashkuar të Kosovës, nga ku u largua dhunshëm nga puna në vitin 1990 nga administrata serbe.
Megjithëse u thirr disa herë në biseda informative nga organet e UDB-së për shkak të rrethit të tij profesional dhe shoqëror, ai kurrë nuk u komprometua dhe vazhdoi të ecë vertikalisht në shërbim të arsimit dhe dijes.
Trashëgimia arsimore
Prof. Sabri Ahmetaj mbetet një nga figurat më të respektuara të arsimit shqiptar në Kosovë, edukator i përkushtuar dhe kontribuues i drejtpërdrejtë në emancipimin arsimor kombëtar.
Brezat e nxënësve dhe kolegëve e kujtojnë si një drejtues vizionar dhe mësues që besonte se arsimi ishte themeli mbi të cilin do të ndërtohej e ardhmja e Kosovës.
Shënim:
Ky tekst nuk mund të kopjohet as të tjetërsohet.
Mund të shpërndahet vetëm si link.
Falemnderit për respektimin e etikës së gazetarisë!
Botuesi dhe redaktori:
/F.S./
