GJILAN – Sot bëhen 27 vite nga vdekja heroike e avokatit të njohur gjilanas, Osman Arifi, i cili u bë simbol i qëndresës dhe mbrojtjes së vlerave të luftës çlirimtare në kohët më të vështira të okupimit.
Më 3 mars të vitit 1999, derisa po zhvillohej procesi gjyqësor kundër grupit të UÇK-së (ku akuzoheshin luftëtarët e lirisë Abdullah Tahiri dhe Ahmet Demiri), avokati Arifi u ballafaqua me guxim të pashoq me prokurorët dhe gjyqtarët e regjimit të Millosheviqit. Ishte pikërisht ky tension dhe përkushtimi i tij mbinjerëzor që bëri që ai të pësonte infarkt brenda në sallën e gjyqit.
Fjalët që mbetën në histori
Osman Arifi ndërroi jetë, por jo pa i thënë fjalët që do të mbeteshin të skalitura në historinë e drejtësisë shqiptare:
“UÇK-në, vetëm ju e quani organizatë terroriste. Krejt bota e quan Ushtri Çlirimtare!”
Ky fjalim i guximshëm, i thënë në mes të Gjykatës së Gjilanit në një kohë kur liria ishte ende një ëndërr e përgjakur, ka peshë dhe kuptim të madh edhe sot. Ai nuk mbrojti vetëm individët, por mbrojti pastërtinë dhe karakterin e luftës së Ushtrisë Çlirimtare të Kosovës.
Një shembull i intelektualit vertikal
Avokati Osman Arifi njihej për profesionalizmin e tij të lartë, drejtësinë dhe dashurinë që kishte për popullin. Ai ishte një intelektual me qëndrim vertikal, i cili nuk u zmbraps asnjëherë para kërcënimeve të sistemit shtypës.
Sot, në këtë përvjetor, kujtesa për të shërben si një thirrje për të nderuar heronjtë e heshtur, ata që luftën nuk e bënë vetëm me armë, por edhe me ligj e me fjalën e lirë, duke sakrifikuar edhe jetën e tyre në altarin e lirisë.
