Kryetari i Gjykatës Themelore në Gjilan, Venhar Salihu, së bashku me shefin e Divizionit Civil, gjyqtarin Bekim Salihu, administratorin Shkëlqim Dushica dhe mbikëqyrësen e Sektorit për Ekzekutim, Arkivim dhe Statistika, Fikrete Destani, pritën në takim përmbaruesit privatë të regjionit të Gjilanit.
Fillimisht, përmbaruesit privatë e vlerësuan lart bashkëpunimin me Gjykatën Themelore në Gjilan.
Ata potencuan faktin se, ndonëse në vitet e kaluara një numër i konsiderueshëm i lëndëve përmbarimore nuk ishin trajtuar brenda një periudhe të arsyeshme kohore, falë angazhimit të vazhdueshëm të gjykatës, këto lëndë tashmë po trajtohen me efikasitet të lartë dhe brenda afateve ligjore.
Në fokus të takimit ishte zbatimi i Memorandumit të Bashkëpunimit të nënshkruar ndërmjet Këshillit Gjyqësor të Kosovës dhe Odës së Përmbaruesve Privatë të Kosovës, si dhe mënyrat e konkretizimit të tij në punën e përditshme me shkresat lëndore.
Gjatë takimit u diskutuan edhe çështje që lidhen me procedurat e ekzekutimit të vendimeve gjyqësore, komunikimin ndërmjet gjykatës dhe përmbaruesve privatë, si dhe nevoja për një koordinim më të mirë në trajtimin e çështjeve praktike që paraqiten gjatë procedurave përmbarimore.
Në përfundim, palët u dakorduan që bashkëpunimi ndërmjet Gjykatës Themelore në Gjilan dhe përmbaruesve privatë të vazhdojë e të intensifikohet, me qëllim zbatimin e plotë të Memorandumit të Bashkëpunimit dhe përmirësimin e shërbimeve për qytetarët dhe palët në procedurë.
