Qendra Kryesore e Mjekësisë Familjare “Dr. Nagip Rexhepi” në Gjilan ka njoftuar qytetarët se është furnizuar me kontingjentin e vaksinave kundër gripit sezonal, ndërsa procesi i vaksinimit do të startojë zyrtarisht të hënën, më 26 tetor 2026.
Sipas njoftimit, vaksinimi do të zhvillohet gjatë ditëve të punës, në orarin nga 07:00 deri në 14:00, në të gjitha qendrat e mjekësisë familjare si në zonën urbane, ashtu edhe në ato rurale të komunës.
Autoritetet shëndetësore rekomandojnë vaksinimin veçanërisht për kategoritë më të ndjeshme të popullatës, ku përfshihen punëtorët shëndetësorë, personat mbi moshën 65-vjeçare, personat me sëmundje kronike pa dallim moshe, gratë shtatzëna si dhe fëmijët.
Me qëllim të mbarëvajtjes së këtij procesi, QKMF u bën thirrje qytetarëve që t’i drejtohen qendrës së mjekësisë familjare ku përkasin sipas zonimit territorial dhe ku zakonisht kryejnë kontrollet mjekësore.
Të gjithë qytetarët që paraqiten për marrjen e vaksinës duhet të jenë të pajisur me një dokument valid identifikimi (letërnjoftim).
