Bordi i Universitetit “Kadri Zeka” (UKZ) në Gjilan ditë më parë ka vlerësuar se Prof. Ass. Dr. Fitore Malaj është një nga personalitetet më të përgatitura për të marrë udhëheqjen e këtij institucioni të arsimit të lartë në pozitën e Ushtrueses së Detyrës së Rektores, duke çmuar përvojën e saj të gjatë akademike, administrative dhe drejtuese.
Nga mësimdhënësja e përkushtuar te gradat më të larta shkencore
Fitore Malaj hapat e parë të shkollimit i kreu në Gjilan, ku përfundoi shkollën fillore dhe të mesme.
E udhëhequr nga dashuria e madhe për profesionin e mësimdhënies, ajo përfundoi studimet në Fakultetin e Edukimit në Gjilan.
Menjëherë pas diplomimit, ajo nisi karrierën e saj si mësuese në shkollën fillore “Thimi Mitko” në Gjilan.
Gjatë punës së saj në këtë institucion, ajo u shqua për përkushtim të lartë, duke gëzuar dashurinë e nxënësve si dhe respektin e thellë të kolektivit dhe prindërve.
Paralelisht me punën fisnike në arsimimin e brezave të rinj, ajo nuk ndali ngritjen profesionale.
Me përkushtim të jashtëzakonshëm, vazhdoi studimet pasuniversitare duke përfunduar magjistraturën dhe më pas doktoraturën, duke marrë titullin Doktor i Shkencave në fushat e edukimit.
Përvoja institucionale dhe drejtuese në UKZ
Sot, Prof. Ass. Dr. Fitore Malaj është profesoreshë në Fakultetin e Edukimit në Universitetin “Kadri Zeka” (UKZ).
Kontributi i saj në këtë universitet është i gjatë dhe me ndikim të drejtpërdrejtë në zhvillimin e institucionit.
Për gjashtë vjet me radhë, ajo ka ushtruar detyrën e Drejtoreshës së Zyrës për Zhvillim Akademik dhe Cilësi, duke udhëhequr me sukses proceset kryesore të sigurimit të cilësisë dhe ngritjes akademike në nivel institucional.
Ajo ka qenë anëtare themeluese dhe anëtare e Këshillit Drejtues të Universitetit “Kadri Zeka” për pesë vjet, ku dha një kontribut të çmueshëm në ngritjen e strukturave qeverisëse dhe konsolidimin e strategjive zhvillimore të universitetit.
Trashëgimi e dinjitetshme kombëtare
Fitore Malaj është bija e Heroit Kombëtar, Rexhep Malaj, çka shton edhe më shumë peshën e përkushtimit dhe integritetit të saj në shërbim të arsimit dhe shoqërisë.
Njohja e thellë e funksionimit të brendshëm të Universitetit “Kadri Zeka” dhe e gjithë sistemit të arsimit të lartë në Kosovë e bën atë një kandidate me bazë mjaft të fortë profesionale për të marrë përsipër udhëheqjen e këtij institucioni në rolin e u.d. rektores.
