Bashkëpunimi mes Gjilanit dhe shtetit të Iowa-s po hyn në një fazë të re dhe konkrete. Drejtori për Kulturë, Rini dhe Sport, Kushtrim Zeqiri, bashkë me zyrtarë të tjerë të Komunës së Gjilanit, kanë realizuar një vizitë zyrtare në institucionet kryesore kulturore dhe rinore në Sioux City, SHBA.
Gjatë qëndrimit atje, delegacioni vizitoi Qendrën e Artit, Muzeun Publik të Sioux City-t dhe Qendrën e të Rinjve, ku u diskutua për projekte të përbashkëta që synojnë fuqizimin e skenës artistike dhe rinore.
Ekspozitë e përbashkët mes dy qyteteve Lajmi kryesor i kësaj vizite është dakordimi fillestar për realizimin e një ekspozite të përbashkët.
Artistët nga Gjilani do të kenë mundësinë të ekspozojnë punimet e tyre krah artistëve nga Sioux City, duke krijuar kështu një urë të rëndësishme komunikimi ndërkombëtar.
“Ky bashkëpunim synon promovimin e artit bashkëkohor, shkëmbimin e përvojave dhe prezantimin e vlerave kulturore të Gjilanit në arenën ndërkombëtare”, ka deklaruar drejtori Zeqiri.
Fokusi te Rinia Në takimin e zhvilluar në Qendrën e të Rinjve, u prezantuan mundësitë për shkëmbime të përvojave dhe projekteve mes të rinjve të Gjilanit dhe atyre të Sioux City-t.
Synimi është krijimi i lidhjeve të reja që do të mundësojnë iniciativa të përbashkëta në të ardhmen, duke u ofruar të rinjve tanë platforma globale për zhvillim.
Kjo vizitë rikonfirmon përkushtimin e Komunës së Gjilanit për të hapur dritare të reja mundësish për artistët dhe të rinjtë gjilanas përmes partneriteteve strategjike me SHBA-në.
