Manipuluesit më të rrezikshëm dhe profilizimi i sjelljeve grabitqare në shoqëri kanë qenë në fokus të një vështrimi profesional të sjellë nga rektorja e Universitetit “Kadri Zeka” në Gjilan, prof. dr. Fitore Malaj.
Përmes kësaj analize, theksohet se njerëzit me tipare psikopatike jo nevojisht gjenden pas grilave, por mund të jenë pjesë e përditshmërisë sonë, në ambiente pune, shkolla apo institucione të ndryshme sociale e fetare.
Ndërsa njohuritë tradicionale mbi psikopatinë janë bazuar kryesisht në listën e Robert Hare-it të vitit 1980 nga studimi i të burgosurve, hulumtimet e fundit shkencore po ia përshtatin këtë koncept psikopatëve që jetojnë “normalisht” mes nesh.
Në këtë kuadër, studiuesja australiane Dr. Karen Mitchell (2024), përmes një hulumtimi me 57 ekspertë me përvojë shumëvjeçare, përfshirë agjentë të FBI-së, psikologë, punonjës socialë dhe drejtues gjyqësorë e fetarë, ka ndërtuar modelin e “personalitetit grabitqar të vazhdueshëm”.
Sipas këtij studimi, ky profil nga jeta e përditshme përbëhet nga 20 tipare kryesore, ku ndër më të rrezikshmet identifikohen nevoja absolute për kontroll mbi të tjerët, dëshira për hakmarrje dhe mizoria, gënjeshtra e vazhdueshme, mbajtja e një fasade normaliteti, si dhe mungesa e plotë e empatisë dhe e pendesës./dita24h/
