Pas një karriere 16-vjeçare në sistemin gjyqësor të Kosovës, gjyqtari i Gjykatës së Apelit, Nehat Idrizi, ka arritur moshën e pensionimit, duke përmbyllur një kapitull të rëndësishëm në shërbim të drejtësisë.
Me rastin e pensionimit, kryetari Totaj e falënderoi gjyqtarin Idrizi për kontributin e tij në sistemin e drejtësisë, duke i uruar shëndet, mbarësi dhe suksese në jetën pas pensionimit.
Nehat Idrizi iu bashkua Gjykatës së Apelit më 7 gusht 2015, ku ushtroi detyrën e gjyqtarit në Departamentin e Përgjithshëm – Divizioni Civil.
Gjatë karrierës së tij, ai mbajti edhe funksionin e Kryesuesit të Këshillit Gjyqësor të Kosovës në periudhën 2016–2019, duke luajtur rol të rëndësishëm në drejtimin dhe zhvillimin e sistemit gjyqësor në vend.
Gjyqtari Idrizi është me prejardhje nga Zhegra e Gjilanit. Edhe para luftës ai ka qenë i angazhuar në detyra të ndryshme profesionale në rajonin e Gjilanit, duke dhënë një kontribut të çmuar në fushën e drejtësisë dhe në jetën institucionale të këtij rajoni.
Pensionimi i tij shënon fundin e një karriere të gjatë dhe të suksesshme, të karakterizuar nga përkushtimi profesional dhe shërbimi ndaj institucioneve të drejtësisë në Kosovë.
