Këshilltari komunal nga radhët e LDK-së në Gjilan, Muhadin Haziri, ka njoftuar përmbylljen e sezonit të korrje-shirjeve në fshatin Zhegër, duke e cilësuar këtë vit si mjaft të vështirë dhe me sfida të shumta për bujqit e zonës.
Haziri ka bërë të ditur se reshjet e dendura të shiut dhe breshëri në shumë zona kanë dëmtuar seriozisht të mbjellat, duke përgjysmuar rendimentet e grurit dhe duke zbehur mundin e një viti të tërë të fermerëve.
Sidoqoftë, ai ka theksuar se puna në tokë kërkon durim, besim dhe përkushtim përballë çdo sfide natyrore.
Përveç dëmeve nga moti, shqetësim kryesor për fermerët mbetet mungesa e rritjes së mbështetjes shtetërore.
Haziri ka potencuar se subvencionet mbeten në nivelin e njëjtë prej 300 eurosh për hektar, prej të cilave 150 euro për hektar, 100 euro për plehërim dhe 50 euro për derivate , ndërkohë që kostot e prodhimit, çmimet e naftës dhe plehrave bujqësore janë rritur ndjeshëm.
Përmes një apeli publik, këshilltari Haziri i ka bërë thirrje Qeverisë së Kosovës dhe Ministrisë së Bujqësisë që të dëgjojnë zërin e bujqve dhe të rrisin mbështetjen financiare për sektorin e bujqësisë.
Sipas tij, fermerët nuk kërkojnë privilegje, por mbështetje të drejtë për të garantuar punën e tyre dhe sigurinë ushqimore të vendit, pasi duke mbështetur fermerin, forcohet vetë Kosova.
