Polica e Kosovës ka mbajtur një konferencë të jashtëzakonshme për media në Qendrën e Njësive Speciale “Enver Zymeri”, ku ka zbuluar detaje nga aksionet e realizuara në 48 lokacione të ndryshme të komunës së Zubin Potokut, si dhe ka ekspozuar një arsenal të madh armësh, municioni e pajisjesh ushtarake të konfiskuara.
Përveç konfiskimit të arsenalit ushtarak, organet e rendit kanë dhënë detaje edhe për progresin në hetimin e “Krimeve të Luftës ndaj Popullatës Civile”.
Në këtë kuadër, në territorin e Zubin Potokut janë zbuluar tri lokacione të dyshuara për varreza masive, ku janë gjetur mbetje kockore që dyshohet se u përkasin së paku 23 individëve.
Lidhur me këto krime, Policia njoftoi se tre persona, me inicialet J. R., M. J., dhe M. B. ndodhen tashmë në masën e paraburgimit nën dyshimin për kryerjen e veprës penale “Krime lufte kundër popullsisë civile”.
Të gjitha veprimet e mëtejshme hetimore po vazhdojnë në bashkëpunim dhe koordinim të ngushtë me organet kompetente të drejtësisë.
