Drita nuk njeh alternativë tjetër përveç fitores në përballjen e sotme ndaj Llapit, pasi vetëm tri pikë e mbajnë skuadrën gjilanase në garë për kreun e tabelës.
Mesfushori i Dritës, Ilir Mustafa, ka theksuar se skuadra është plotësisht e përqendruar në këtë sfidë:
“Jemi të fokusuar 100% në 90 minutat e ndeshjes për të arritur tri pikëshin tonë. Duhet ta harrojmë ndeshjen e javës së kaluar dhe të mendojmë vetëm për fitoren e radhës,” deklaroi Mustafa.
Edhe trajneri Zekirija Ramadani ka kërkuar përqendrim maksimal nga lojtarët e tij, duke e cilësuar këtë periudhë si shumë të ngjeshur për skuadrën.
“Ka qenë një javë e lodhshme, por futbollistët duhet të dalin nga vetja dhe të japin maksimumin, si ndaj Llapit ashtu edhe në ndeshjen e së enjtes në Irlandë. Ne jemi këtu për t’i mbështetur djemtë dhe jam i bindur se, nëse vazhdojmë kështu, do ta menaxhojmë mirë edhe pjesën tjetër të kampionatit,” tha Ramadani.
Ai shtoi se te Drita nuk ekziston relaksimi:
“Te ne ka vetëm përqendrim dhe angazhim maksimal nga të gjithë, sepse kampionati është maratonë.”
Ndeshja FC Drita – FC Llapi zhvillohet sot në orën 13:00, në “Stadiumin Sintetik” të Gjilanit.
