Universiteti Publik “Kadri Zeka” në Gjilan ka pritur një delegacion të investitorëve dhe përfaqësuesve të bizneseve nga India, në kuadër të vizitës së tyre në Gjilan për të shqyrtuar mundësitë e bashkëpunimit në fushat e arsimit, teknologjisë, inovacionit dhe zhvillimit ekonomik.
Delegacioni i kryesuar nga Dr. Asif Iqbal u prit nga Prorektorja për Mësimdhënie, Hulumtime dhe Kërkime Shkencore, Prof. Ass. Dr. Lindita Loku Nikçi, e cila prezantoi aktivitetet, programet studimore dhe orientimin strategjik të universitetit drejt ndërkombëtarizimit.
Gjatë takimit u diskutuan mundësitë për shkëmbim studentësh dhe stafi akademik, organizimin e konferencave të përbashkëta shkencore, si dhe krijimin e partneriteteve me institucione akademike dhe kompani nga India.
Vëmendje e veçantë iu kushtua fushës së teknologjisë informative, ku u shqyrtua mundësia e zhvillimit të programeve të përbashkëta të trajnimit dhe certifikimit për studentët e Shkencave Kompjuterike, me synim rritjen e kompetencave profesionale dhe përgatitjen e tyre për tregun ndërkombëtar të punës.
Në përfundim, të dyja palët shprehën gatishmërinë për të vazhduar bashkëpunimin dhe për t’i konkretizuar idetë e diskutuara në projekte dhe aktivitete të përbashkëta në të ardhmen.
