Në kampionain 1996/97, pas një sezoni të jashtëzakonshëm plot sakrificë, vetëmohim dhe lojë cilësore, Klubi i Basketbollit Drita nga Gjilani shkroi emrin me shkronja të arta në historinë e basketbollit të Kosovës, duke u shpallur kampion i Kosovës për herë të parë.
Ajo periudhë e viteve të 90-ta nuk ishte thjesht garë sportive, por një faqe e rëndësishme e rezistencës qytetare e kombëtare.
Ndeshjet zhvilloheshin nëpër salla e oborre të shkollave fillore e të mesme, pasi pushteti i orkestruar serb i asaj kohe nuk i lejonte sportistët shqiptarë të shfrytëzonin palestrat sportive.
Në ato kushte mjaft të vështira të mbijetesës, një rol vendimtar e historik patën donatorët e KB Dritës, njerëz vullnetmirë e patriotë që ndanë mjete direkte nga xhepi i tyre personal për ta mbajtur gjallë klubin.
Pa asnjë përfitim material e me rrezikim të vazhdueshëm, ata financuan udhëtimet, pajisjet dhe organizimin e ndeshjeve, duke u bërë shtylla kryesore e atij suksesi historik.
Sakrifica e tyre financiare mundësoi që lojtarët dhe trajnerët të përqendroheshin në parket dhe ta shndërronin atë terren të improvizuar në arenë dinjiteti.
Tri dekada më parë, kjo fotografi fiksoi në kohë gjeneratën e artë që ngriti lart trofeun e historisë.
Sot, ndërsa e shohim këtë imazh me krenari, ndjejmë edhe dhimbjen e mungesës për disa nga protagonistët e asaj arritjeje, lojtarë dhe një trajner që dhanë gjithçka në parket, e që tashmë janë ndarë nga jeta.
Mundit, djersës dhe kontributit të tyre profesional e njerëzor, si dhe mbështetjes së pashoq të donatorëve, KB Drita u përkulet gjithmonë me respekt të thellë.
Përkushtimi i tyre mbetet i skalitur përgjithmonë në themeltë e historisë së basketbollit gjilanas dhe kosovar.
