Ish-zëdhënësi i UÇK-së për Zonën e Karadakut, Ismet Sylejmani, ka rikthyer në kujtesë një nga ngjarjet më të mëdha gjithëpopullore të pasluftës në Kosovë, duke publikuar pamje dhe rrëfime nga fjalimi i Mehmet Hajrizi në Gjilan, më 31 mars të vitit 2000.
Ky manifestim, i mbajtur në nderim të ngjarjeve të vitit 1981, mblodhi mijëra qytetarë dhe u shndërrua në një rikthim të fuqishëm të frymës së organizimit, sakrificës dhe përkushtimit për liri.
Në fjalimin e tij, Hajrizi theksoi se demonstratat e vitit 1981 përbënin një kthesë historike për popullin shqiptar në Kosovë, duke shënuar fillimin e një etape të re të rezistencës së organizuar dhe rritjen e vetëdijes kombëtare.
Ai nënvizoi se asgjë nuk ishte e rastësishme, por rezultat i një pune të gjatë ilegale, disipline dhe sakrifice të madhe nga veprimtarët, shumë prej të cilëve ranë për lirinë e vendit.
Sipas tij, kjo përvojë shërbeu si bazë për krijimin e strukturave të armatosura që më vonë kulmuan me daljen në skenë të Ushtrisë Çlirimtare të Kosovës, duke dëshmuar se UÇK-ja ishte vazhdimësi e një rruge të gjatë përpjekjesh.
Në mesazhin drejtuar të rinjve, Hajrizi theksoi se liria është rezultat i një procesi të gjatë dhe se çdo brez ka përgjegjësinë e vet në ruajtjen dhe ndërtimin e shtetit.
Fjalimi i tij në këtë manifestim mbetet një dëshmi e rëndësishme historike dhe një nga momentet më domethënëse të kujtesës kolektive për rrugën drejt lirisë së Kosovës.
