Drejtoria e Inspeksionit në Gjilan ka realizuar rrënimin e një objekti të ndërtuar pa leje në pronë komunale në lagjen “Arbëria”, i cili ishte i uzurpuar nga personi me inicialet T.S. për më shumë se dy dekada.
Sipas njoftimit zyrtar, fillimisht palës i ishte dhënë afat kohor për ta larguar objektin/shtallën në mënyrë vullnetare.
Pasi ky afat nuk u respektua, Drejtoria e Inspeksionit shqiptoi gjobë për shfrytëzim të paautorizuar të hapësirës publike.
Për shkak se objekti nuk u largua as pas ndëshkimit me gjobë, organet komunale ekzekutuan vendimin për lirimin e pronës përmes rrënimit dhe pastrimit të tërësishëm të terrenit.
Nga kjo drejtori bëjnë me dije se ky aksion është pjesë e angazhimit për t’u rikthyer qytetarëve hapësirat e uzurpuara.
Gjithashtu, u bëhet thirrje të gjithë banorëve që të respektojnë normativat ligjore, në mënyrë që pronat komunale të mbeten të lira, të sigurta dhe të qasshme për të gjithë.
