Në kuadër të manifestimit tradicional “Ditët e Diasporës”, Komuna e Bujanocit ka organizuar një mbrëmje të veçantë e të mbushur me emocione, kushtuar bashkatdhetarëve që jetojnë e veprojnë në mërgim.
Në këtë aktivitet më ndryshe nga të tjerët, protagonistet kryesore ishin gratë e palodhura të komunitetit lokal, të cilat me shumë përkushtim e dashuri përgatitën sofren me ushqime tradicionale të zonës.
Përmes shijes dhe aromës së gatimeve të shtëpisë, ato i dhuruan bashkatdhetarëve tanë një udhëtim nostalgjik në kujtimet e vendlindjes.
”Ushqimi i traditës dhe ngrohtësia e vatrës familjare janë ura më e fortë lidhëse me rrënjët tona.”
Për t’i dhënë këtij aktiviteti dinjitetin e merituar, Komuna e Bujanocit mbuloi të gjitha shpenzimet për përgatitjen e ushqimeve, duke e kthyer këtë mbrëmje në një shenjë konkrete mirënjohjeje, respekti dhe falënderimi për kontributin e paçmueshëm që diaspora jep vazhdimisht për vendin.
Komuna ka shprehur falënderimet më të përzemërta për secilën grua që kontribuoi me punën dhe duart e saj të arta, duke e kthyer këtë ngjarje në një nga momentet më të spikatura dhe më domethënëse të këtij edicioni të “Ditëve të Diasporës”.
Atmosfera e ngrohtë dhe mikpritja e treguar sonte dëshmuan edhe një herë se pavarësisht largësisë, Bujanoci mbetet gjithmonë shtëpia e hapur për të gjithë mërgimtarët e tij.
