Kryeministri i Kosovës, Albin Kurti, është takuar për herë të parë me Presidentin e Shteteve të Bashkuara të Amerikës, Donald J. Trump, gjatë punimeve të Javës së Nivelit të Lartë të Asamblesë së Përgjithshme të Organizatës së Kombeve të Bashkuara (OKB) në Nju Jork.
Njoftimin e ka bërë të ditur vetë kryeministri Kurti përmes një postimi, ku e ka cilësuar takimin si një nder të veçantë dhe ka ritheksuar rëndësinë e marrëdhënieve strategjike ndërmjet dy vendeve.
Sipas Kurtit, fokus i diskutimit ka qenë bashkëpunimi në fushën e mbrojtjes dhe integruesit me Aleancën Veriatlantike.
“Në kuadër të Javës së Nivelit të Lartë të Asamblesë së Përgjithshme të OKB-së, kisha nderin që të takoj për herë të parë Presidentin e Shteteve të Bashkuara të Amerikës, z. Donald J. Trump. E falënderova për ngritjen e valës së investimeve në mbrojtje në NATO, ku edhe Kosova duhet të anëtarësohet,” ka deklaruar Kurti.
Kreu i ekzekutivit kosovar ka nënvizuar se rolin e Uashingtonit në mbështetjen e Kosovës e sheh si tejet përcaktues për të ardhmen e vendit.
”Shtetet e Bashkuara të Amerikës janë aleati kryesor, partneri i pazëvendësueshëm dhe miku special i Republikës së Kosovës,” është shprehur ndër të tjerash kryeministri.
