Në Galerinë e Arteve në Berat po vazhdon të qëndrojë e hapur ekspozita personale “Rrënjët” e piktorit të mirënjohur gjilanas me banim në Kanada, Zeqirja Rexhepi.
Ekspozita, e cila u hap më 2 korrik, ka zgjuar interesim të madh te artdashësit lokalë dhe do të jetë e hapur për vizitorët deri më 12 korrik 2026.
Përmes këtij prezantimi kulturor, artisti Zeqirja Rexhepi ka sjellë një seri veprash të përzgjedhura me kujdes, të cilat mbartin një kolorit të pasur dhe tone të fuqishme ekspresioniste.
Pikturat e tij përcjellin me shumë mjeshtëri vibrimet emocionale të një krijuesi që jeton dhe vepron midis dy botëve: modernitetit metropolitan kanadez dhe kujtimeve e nostalgjisë së pashlyeshme për vendlindjen e tij, Gjilanin.
Të gjithë qytetarët dhe adhuruesit e artit pamor që nuk e kanë vizituar ende, kanë kohë edhe tri ditë (deri të dielën) për t’i parë nga afër këto kryevepra që gërshetojnë me sukses rrënjët tona me artin bashkëkohor botëror.
