Stadiumi dhe ambientet e klubit SC Gjilani sot nuk ishin vetëm arenë e stërvitjeve të rrepta, por u shndërruan në një vatër dashurie dhe gjithëpërfshirjeje.
Në kuadër të iniciativës “Ndriço” nga Down Syndrome Kosova, futbollistët e “kuqebardhëve” kanë pritur mysafirët më të veçantë, duke dëshmuar se fitorja më e madhe arrihet jashtë vijave të bardha të fushës.
Në fushë sot nuk kishte vetëm top, kishte dritë, buzëqeshje dhe zemra të mëdha! Futbollistët e SC Gjilanit ndanë energjinë dhe emocionet me fëmijët, duke krijuar momente të paharrueshme plot lojë, të qeshura dhe miqësi të sinqertë.
Kjo përvojë, që shkon përtej sportit, tregoi se loja më e bukur është ajo që i përfshin të gjithë pa dallim.
Vizita në ambientet e klubit e bëri këtë ditë edhe më magjike për fëmijët. Ata patën mundësinë të shohin nga afër hapësirat ku ëndrrat e futbollistëve marrin formë, duke u ndjerë për një ditë si pjesë e pandashme e një skuadre të madhe.
Ky gjest i SC Gjilanit u vlerësua lart si një mesazh i fuqishëm për shoqërinë tonë mbi rëndësinë e përkrahjes dhe integrimit të fëmijëve me Down Syndrome.
Aktiviteti kulmoi me momente loje të përbashkët, ku çdo gol i shënuar dhe çdo pasim ishte një festë më vete.
Klubi gjilanas u zotua se do të vazhdojë të jetë krah nismave të tilla që promovojnë barazinë, sepse siç u pa edhe sot: kur zemrat luajnë bashkë, çdo ditë është një fitore e madhe!
