Drejtoria e Shëndetësisë dhe Mirëqenies Sociale në Gjilan, në bashkëpunim me Qendrën Kryesore të Mjekësisë Familjare (QKMF), organizon marshin sensibilizues në kuadër të fushatës për ndërgjegjësimin dhe luftën kundër kancerit të gjirit.
Aktiviteti do të mbahet të martën, më 6 tetor 2026, ku grumbullimi i pjesëmarrësve do të bëhet në orën 12:00 para Teatrit të Qytetit.
Nga Teatri i Qytetit, marshi sensibilizues do të vazhdojë drejt objektit të QKMF-së.
Pas përfundimit të marshit, në Qendrën e Trajnimeve (kati i dytë i QKMF-së), do të bëhet hapja zyrtare e fushatës sensibilizuese me mesazhe kyçe për parandalimin, kontrollet e rregullta dhe rëndësinë e diagnostikimit të hershëm.
Kjo fushatë synon të rrisë ndërgjegjësimin dhe të inkurajojë çdo grua që të kujdeset për shëndetin e saj.
Nën moton “Diagnostikimi i hershëm shpëton jetë”, organizatorët u bëjnë thirrje qytetarëve të bashkohen në këtë marsh dhe të ecin së bashku për të përcjellë një mesazh që shpëton jetë. / dita24h /
