Drejtoria Rajonale e Policisë në Gjilan, përmes Njësisë rajonale të Trafikut Rrugor dhe stacioneve policore, ka ndërmarrë një aksion të gjerë në kuadër të planeve operative për rritjen e sigurisë në komunikacion.
Gjatë periudhës javore nga 15 maji deri më 21 maj 2026, efektivët policorë kanë shqiptuar gjithsej 1,795 gjoba për shkelësit e rregullave të trafikut rrugor. Ky mobilizim i shtuar vjen si përgjigje ndaj nevojës urgjente për të parandaluar aksidentet dhe për të vetëdijesuar ngasësit në tërë rajonin e Anamoravës.
Përveç gjobave të përgjithshme, gjatë kësaj jave policia ka hetuar 19 aksidente trafiku me dëme materiale si dhe 10 aksidente të tjera ku ka pasur persona të lënduar.
Sa i përket shkeljeve specifike, janë shqiptuar 13 gjoba për mos-përdorim të rripit të sigurisë, 9 gjoba për përdorim të telefonit gjatë ngasjes dhe 31 gjoba për modifikim të automjeteve, kryesisht për vendosjen e folieve të errëta në xhama.
Masat kanë qenë tejet rigoroze edhe për ngasësit më të rrezikshëm, ku për 58 prej tyre është shqiptuar masa e ndalimit të drejtimit të mjeteve motorike, duke ua pezulluar përkohësisht patentë shoferin.
Në kuadër të këtij bilanci, Drejtoria Rajonale e Policisë në Gjilan ka lëshuar një apel të rëndësishëm edhe për këmbësorët, duke kërkuar nga ta kujdes të shtuar dhe respektim të plotë të rregullave gjatë pjesëmarrjes në trafik.
Autoritetet policore tërheqin vërejtjen se përdorimi i telefonit mobil, mbajtja e dëgjueseve në vesh gjatë ecjes, mosrespektimi i semaforëve apo kalimi i rrugës jashtë vendkalimeve të shënuara, përbëjnë shkelje serioze që rrezikojnë jetën dhe që do të sanksionohen rreptësisht sipas legjislacionit në fuqi.
