Ka mjaftuar një gol i sulmuesit Blerim Krasniqi që Drita të arkëtojë tri pikë të “arta” në kuadër të javës së 31-të të Superligës së Kosovës.
Bardhekaltërit fituan me rezultat minimal 1:0 kundër rivalit të vjetër, Prishtinës.
Ndeshja ishte e fortë dhe e luftuar deri në fund, por momenti vendimtar erdhi në minutën e 83-të.
Liridon Balaj shpërtheu bukur nga krahu i djathtë dhe nisi një krosim të ulët në zonë, ku Blerim Krasniqi u tregua i vëmendshëm dhe nga afërsia mposhti portierin prishtinas për rezultatin 1:0.
Me këtë fitore, Drita dëshmon pjekuri dhe vullnet të çeliktë për të ruajtur titullin e kampionit për të dytin vit radhazi.
Pas kësaj xhiroje, gjilanasit ngjiten në kuotën e 60 pikëve, duke krijuar një distancë prej 8 pikësh me Ballkanin (i cili luan nesër).
Kur kanë mbetur edhe 5 xhiro deri në fund të kampionatit, Drita duket e pandalshme në rrugëtimin e saj drejt trofeut, duke i dhënë një mesazh të qartë të gjithë rivalëve.
