Në një ceremoni madhështore të përcjellë me emocione dhe lartësim akademik, Universiteti Publik “Kadri Zeka” në Gjilan (UKZ) i ka ndarë titullin më të lartë, “Doctor Honoris Causa”, z. Bernd Ulrich Nestle. Ky vlerësim vjen si mirënjohje për kontributin e tij jetik në reformimin e sistemit shëndetësor dhe farmaceutik në Kosovë, si dhe për forcimin e urave të bashkëpunimit mes Kosovës dhe Gjermanisë.
Ceremonia nisi me pritjen zyrtare nga Rektori, Prof. Asoc. Dr. Artan Dërmaku, ku laureati u nënshkrua në Librin Amë të Universitetit. Gjatë fjalës së tij, Rektori Dërmaku e cilësoi këtë si një ditë historike për UKZ-në.
“Sot nderojmë një personalitet që bashkon shkencën me humanizmin. Z. Nestle është shembulli i rrallë i përkushtimit ndaj pacientëve tanë dhe zhvillimit të kapitalit njerëzor,” u shpreh ai.
Për rëndësinë e kësaj figure folën edhe Rektorja e IBCM-së, Mihane Kerolli, dhe kryetari i Bordit Këshillëdhënës Industrial, Ibrahim Krivaqa, duke vënë theksin te ndërkombëtarizimi i arsimit të lartë. Laudatori i ceremonisë, Prof. Dr. Dukagjin Leka, shpalosi biografinë e pasur të Nestle, duke evokuar angazhimin e tij shumëvjeçar në përmirësimin e shërbimeve mjekësore në vendin tonë.
Pas leximit të vendimit të Senatit nga Prorektorja Lindita Loku Nikqi dhe dorëzimit të diplomës nën tingujt e himnit akademik “Gaudeamus”, z. Nestle u shpreh i prekur nga ky nderim. Ai theksoi se lidhja e tij me Kosovën tejkalon anën profesionale, duke u shndërruar në një mision shpirtëror e njerëzor.
Eventi u përmbyll me një pikë artistike nga solistja Eliesa Bajrami dhe prof. Xhentian Jetishi, duke i dhënë fund një dite që rikonfirmoi miqësinë e palëkundur kosovaro-gjermane përmes dijes dhe mirënjohjes.
