Ish-futbollisti i SC Gjilanit, Fatjon Bunjaku, ka ndërruar jetë në mënyrë tragjike në moshën 22-vjeçare, pas një aksidenti të rëndë automobilistik që ka ndodhur sot pas mesnate në aksin rrugor Prishtinë – Mitrovicë.
Ky lajm i trishtë ka tronditur thellë komunitetin sportiv në Gjilan dhe mbarë opinionin publik.
Sulmuesi i talentuar, i cili la gjurmë në futbollin e Anamoravës, u bashkua me Gjilanin në janar të vitit 2024, ku barti fanellën me numrin 8.
Ai debutoi me ngjyrat kuqebardhë në ndeshjen e Kupës së Kosovës kundër Prishtinës, duke fituar menjëherë simpatinë e sportdashësve vendas, ndërsa luajti edhe në kampionat duke dhënë kontributin e tij në Superligë.
Përveç eksperiencës te Gjilani, 22-vjeçari nga Samadrexha e Vushtrrisë kishte ndërtuar një karrierë të pasur për moshën e tij, duke luajtur edhe për skuadrat e njohura si Trepça, Phoenix e Banjës, Liria dhe Malisheva, si dhe regjistroi paraqitje me Kombëtaren e Kosovës U-21.
Në verën e kaluar, ai u transferua te KF Elbasani në Shqipëri, ku sapo kishte mbyllur një sezon mjaft të suksesshëm duke siguruar daljen në garat evropiane.
Lajmin për ndarjen tragjike nga jeta e kanë konfirmuar edhe përmes rrjeteve sociale nga fshati i tij i lindjes, Samadrexhë, ku thuhet se për ditën dhe orën e varrimit qytetarët do të njoftohen me kohë.
Vdekja e parakohshme e Fatjon Bunjakut ka lënë një zbrazëti të madhe dhe ka pikëlluar të gjithë ata që e njohën brenda dhe jashtë fushës së gjelbër.
