Në shënim të 1 Qershorit – Ditës Ndërkombëtare të Fëmijëve, në repartin e Neonatologjisë në Spitalin e Përgjithshëm të Gjilanit ka filluar zyrtarisht zbatimi i skriningut neonatal.
Ky shërbim i ri dhe tejet i rëndësishëm për shëndetin publik konsiston në testimin e gjakut nga thembra e të porsalindurve për zbulimin e hershëm të pesë sëmundjeve të rënda.
Drejtori i Spitalit të Përgjithshëm të Gjilanit, Dr. Afrim Cana, theksoi se ky është një hap i madh drejt avancimit të shërbimeve të reja shëndetësore.
Sipas tij, menaxhmenti po punon vazhdimisht në plotësimin e këtyre shërbimeve me qëllim të ofrimit të kujdesit sa më cilësor për qytetarët dhe forcimit të shëndetit publik.
Si kryhet testi dhe cilat sëmundje zbulohen?
Udhëheqësi i repartit të Neonatologjisë, Dr. Blerim Bajrami, ka shpjeguar se ky test i thjeshtë gjaku kryhet zakonisht 24 deri në 48 orë pas lindjes dhe konsiston në marrjen e vetëm disa pikave të gjakut nga thembra e foshnjës.
Në këtë fazë fillestare, programi i skriningut do të përfshijë zbulimin e hershëm të këtyre sëmundjeve: Fenilketonuria, Galaktozemia, Fibroza cistike, Hipotiroidizmi kongjenital dhe Atrofia muskulare spinale (SMA)
Pse është jetik ky proces?
Mjekët sqarojnë se përfshirja e këtyre sëmundjeve në program është bërë sepse ato mund të detektohen shumë herët, përpara shfaqjes së simptomave.
Diagnostikimi i hershëm mundëson fillimin e menjëhershëm të trajtimit, gjë që ndihmon në parandalimin e dëmtimeve serioze neurologjike, metabolike dhe zhvillimore, duke përmirësuar ndjeshëm cilësinë e jetës së fëmijës.
Fillimi i këtij programi në Gjilan paraqet një kthesë të rëndësishme për kujdesin ndaj të porsalindurve dhe një dhuratë të vërtetë për sigurinë shëndetësore të fëmijëve në festën e tyre.
