Spitali i Përgjithshëm i Gjilanit po kalon nëpër një transformim rrënjësor modern, duke investuar fuqishëm në infrastrukturë dhe pajisje mjekësore sipas standardeve më të larta evropiane.
Në kuadër të këtyre ndryshimeve të mëdha, sot është bërë përurimi i Shërbimit të ri të Hemodializës, një projekt ky jetik për pacientët e tërë rajonit.
Në ceremoninë e prerjes së shiritit morën pjesë krerët më të lartë institucionalë, përfshirë Ministrin e Shëndetësisë, Dr. Arben Vitia, Kryetarin e Komunës së Gjilanit, z. Alban Hyseni, Drejtorin e SHSKUK-së, z. Elvir Azizi, si dhe drejtorin e spitalit, Dr. Afrim Cana, të cilët e vlerësuan lart këtë arritje të përbashkët.
Rëndësia e këtij investimi pasqyrohet më së miri në shifrat e mbingarkuara të këtij reparti, i cili deri më tani ka operuar me vetëm 18 shtretër.
Udhëheqësi i këtij shërbimi, Dr. Afrim Bekteshi, bëri të ditur se gjatë vitit të kaluar 2025 janë realizuar plot 6,184 trajtime të dializës, me një mesatare prej 515 pacientësh në muaj dhe rreth 25 personave në ditë.
Ky fluks rritet edhe më shumë gjatë muajve të verës për shkak të ardhjes së madhe të bashkatdhetarëve nga mërgata, gjë që e bënte të domosdoshëm zgjerimin e kapaciteteve.
Ministri Vitia dhe drejtori i SHSKUK-së, Azizi, premtuan mbështetje të vazhdueshme për modernizimin e spitaleve tona, me qëllim që pacientët të marrin shërbime sa më cilësore dhe të qasshme.
Nga ana tjetër, kryetari Alban Hyseni u shpreh se çdo investim në shëndetësi është investim direkt në jetën e qytetarëve, duke konfirmuar gatishmërinë e komunës për projekte të ngjashme.
Ndërkaq, udhëheqësit klinikë, Dr. Afrim Cana dhe Dr. Nezit Demolli, u shprehën të lumtur që ky mjedis modern dhe funksional tashmë do t’u ofrojë pacientëve siguri maksimale dhe një komoditet që u ka munguar prej vitesh.
