Drejtoria Komunale e Arsimit (DKA) në Gjilan ka nisur një proces të rëndësishëm koordinimi për të mbështetur maturantët në njërën prej fazave më përcaktuese të jetës së tyre: zgjedhjen e karrierës së ardhshme.
Drejtori i kësaj drejtorie, Jeton Rexhepi, ka zhvilluar dje një takim informues dhe koordinues me Këshilltarët për Karrierë të shkollave të mesme të larta të komunës.
Ky takim kishte për qëllim sinkronizimin e aktiviteteve që do t’u ofrojnë maturantëve informacione të detajuara mbi mundësitë arsimore dhe profesionale që i presin pas përfundimit të maturës.
Gjatë takimit u theksua se roli i Këshilltarit për Karrierë brenda shkollave është një komponent jetik në sistemin arsimor. Si bashkëpunëtorë profesionalë, ata ndihmojnë nxënësit të identifikojnë interesat, aftësitë dhe potencialin e tyre personal.
Përmes këshillimit të vazhdueshëm dhe aktiviteteve orientuese, nxënësit e Gjilanit do ta kenë më të lehtë të marrin vendime të informuara për rrugëtimin e tyre akademik, duke shmangur gabimet në përzgjedhjen e profesioneve.
Nga ana e tij, drejtori Rexhepi rikonfirmoi se DKA mbetet e përkushtuar në fuqizimin e këtyre shërbimeve profesionale.
Sipas tij, mbështetja e këshilltarëve të karrierës nuk ndikon vetëm në të ardhmen individuale të nxënësve, por rrit drejtpërdrejt cilësinë e të gjithë procesit edukativo-arsimor në komunën e Gjilanit.
Ky koordinim pritet të pasohet me aktivitete konkrete nëpër shkolla, ku maturantët do të kenë qasje të drejtpërdrejtë në këshillim profesional për tregun e punës dhe studimet universitare.
