Profesorët gjilanas po vazhdojnë të dëshmojnë sukseset e tyre në arenën ndërkombëtare, duke u bërë pjesë e katedrave më prestigjioze evropiane.
Në kuadër të bashkëpunimit akademik ndëruniversitar, profesoresha nga Gjilani, Milote Sadiku, ka mbajtur një ligjëratë mjaft të rëndësishme para studentëve të Universitetit të Regensburgut në Gjermani.
Profesoresha Sadiku, e cila është ligjëruese e rregullt në Fakultetin e Filologjisë – Dega e Gjuhës dhe Letërsisë Gjermane në Universitetin e Prishtinës dhe gëzon një përvojë të gjatë e të suksesshme në nivelin akademik, ligjëroi para studentëve të programit “Gjermanishtja si gjuhë e dytë / gjuhë e huaj” (DaZ/DaF).
Ligjërata u zhvillua në një atmosferë të shkëlqyer profesionale, ku studentët gjermanë dhe stafi akademik i universitetit pritës patën mundësinë të ndajnë perspektiva të reja ndërkulturore.
Ky aktivitet shërbeu si një urë e fuqishme e shkëmbimit të përvojave dhe njohurive mes dy vendeve.
Me këtë rast, Fakulteti i Filologjisë ka shprehur mirënjohjen e tij të thellë për mikpritjen e ngrohtë dhe bashkëpunimin e frytshëm me institucionin gjerman.
Gjithashtu, një falënderim i veçantë i është dedikuar edhe profesoreshës Blertë Ismajli, e cila përgjatë këtij semestri veror të vitit 2026 po qëndron si ligjëruese mysafire në Universitetin e Regensburgut, duke lehtësuar dhe rritur urat e bashkëpunimit ndëruniversitar.
