Libri i prof. Xhafer Xhaferit, “Pogragja ndër shekuj”, sjell dëshmi dhe fakte interesante për fillimet e zhvillimit të sportit në rajonin e Gjilanit dhe Anamoravës, duke lartësuar figurën e Halim N. Halimit (1937-2022) si një pionier të suksesshëm të jetës sportive në këtë trevë.
Sipas të dhënave dhe dokumenteve të prezantuara në këtë libër, klubi i hendbollit i Gjilanit në atë kohë quhej “Partizani”, dhe bënte gara në Ligën e Kosovës. Në vitin 1960, i vetmi lojtar i nacionalitetit shqiptar në radhët e këtij ekipi ka qenë pikërisht Halim Halimi nga Pogragja. Ai u aktivizua dhe luajti me sukses për këtë klub deri në vitin 1963.
Kush ishte Halim Halimi?
I lindur në vitin 1937, Halim Halimi ishte një nga pogragjasit e parë që u mor me lojëra sportive si hendbolli, basketbolli e futbolli, duke i kultivuar ato me pasion te rinia lokale. Ai ishte nxënësi i parë i rregullt nga Pogragja që kreu Shkollën Normale në Prishtinë (1959). Gjatë kohës së shkollimit, ai luajti për Klubin e Hendbollit “Normalisti” në Prishtinë, i cili asokohe ishte ndër më cilësorët dhe disa herë kampion në Kosovë.
Përveç hendbollit, Halimi la gjurmë të rëndësishme edhe në disiplina të tjera:
Në basketboll: Luajti dhe udhëhoqi ekipin e Gjilanit në turne të ndryshme të organizuara nëpër Kosovë.
Në futboll: Luajti për ekipin e Ranillugut në kuadër të garave regjionale (ndërkomunale).
Kontributi në arsim dhe media
Pas diplomimit në vitin 1959, Halimi u kthye në vendlindje si mësimdhënës dhe më pas shërbeu si drejtor i Shkollës Fillore të Pogragjës (1960-1967).
Si arsimtar i kulturës fizike, ai bëri hapa revolucionarë duke blerë veshje sportive për nxënësit për herë të parë në vitin 1959/60 dhe duke i përfshirë masivisht si djemtë, ashtu edhe vajzat, në disiplina si volejbolli, hendbolli e atletika.
Rrugën e tij sportive në klubin “Normalisti” e ndoqën më vonë edhe ish-nxënësit e tij si Nuhi Rexhepi, Rifat Shabani dhe Sadik Qamili (Rashiti).
Përveç kontributit të jashtëzakonshëm si sportist, pedagog dhe drejtues shkolle, Halim Halimi më vonë shërbeu me sukses edhe si drejtor i Radio Gjilanit, që asokohe ishte një medium me ndikim të fuqishëm informativ për mbarë rajonin e Anamoravës.
