Kushtrim Kadriu kërkon mbështetje buxhetore për bletarët e Gjilanit pas një sezoni të dobët të mjaltit
Asambleisti i Lëvizjes Vatra në Komunën e Gjilanit, Kushtrim Kadriu, në koordinim me Shoqatën e Bletarëve të Gjilanit, ka dorëzuar zyrtarisht kërkesën për planifikimin e buxhetit për vitin 2027, me fokus të veçantë mbështetjen e drejtpërdrejtë financiare për bletarët lokalë.
Kjo ndërhyrje vjen si pasojë e një prej sezoneve më të dobëta të regjistruara ndonjëherë në prodhimin dhe vjeljen e mjaltit, situatë kjo që ka dëmtuar rëndë sektorin e bletarisë në këtë komunë.
Sipas Kadriut, shumë bletarë përballen me humbje të mëdha pasi kanë pasur prodhim minimal ose nuk kanë arritur të vjelin fare mjaltë gjatë këtij sezoni.
Në kërkesën e dorëzuar theksohet se subvencionet aktuale janë të pamjaftueshme për të mbuluar kostot e mbajtjes së shoqërive të bletëve dhe sfidat me të cilat po përballen prodhuesit lokalë.
Për këtë arsye, kërkohet që në kuadrin e planifikimit buxhetor për vitin 2027 të përfshihet një skemë e posaçme ndihmuese për të parandaluar dëmtimin e mëtejshëm të këtij sektori vital të bujqësisë.
