Trajneri Debatik Curri ka folur para përballjes me KF Dukagjini, duke theksuar se skuadra e tij po kalon një periudhë shumë të mirë dhe synon të vazhdojë me rezultate pozitive.
Sipas Currit, ekipi është në formë të mirë si në aspektin fizik ashtu edhe në atë psikologjik, gjë që i jep besim për këtë ndeshje.
Ai ka vlerësuar kundërshtarin si të fortë, sidomos në mbrojtje dhe në kundërsulme, por ka shtuar se skuadra e tij ka bërë përgatitjet e duhura për t’u përballur me këtë stil loje.
“Jemi në momentum të mirë dhe kjo na jep vetëbesim. Kemi punuar maksimalisht gjatë javës dhe e dimë se na pret një ndeshje e vështirë. Megjithatë, hyjmë në fushë me synimin e qartë për fitore. Duhet të jemi të përqendruar nga minuta e parë deri në fund dhe të shfrytëzojmë çdo rast që na jepet, sepse në këtë fazë çdo pikë është shumë e rëndësishme”, ka deklaruar Curri.
Ai shtoi se vazhdimësia e rezultateve pozitive është kyçe për të qëndruar në garë për objektivat e sezonit.
